Padayun nga gina-review it Department of Labor and Employment (DOLE)-6 ag Regional Tripartite Wages and Productivity Board (RTWPB)-6 ro petisyong gindihon it BPO Industry Employees Network (BIEN) nga nagahinyu nga ipasaka sa P800 ro minimum nga adlawan nga sweldo sa Western Visayas.
Suno kay DOLE Regional Director Sixto Rodriguez Jr., nga imaw man ro chairman it RTWPB-6, pagatun-an nanda ro nasambit nga mga petisyon kaibahan ro ginpasaka it Iloilo Doctors Hospital Employees Union nga nagahinyu man nga ipasaka sa P800 ro minimum nga adlawan nga sweldo halin sa presenteng P550.
Nauna kara, ginbasura suno kana ro petisyon it United Labor Panay bangud nga owa raya it legal nga personalidad matapos masayuran nga bukon sanda it rehistrado sa Securities and Exchange Commission (SEC).
Suno sa BIEN, ginakinahangean ro insigida nga wage increase bangud sa padayun nga pagtaas it inflation, presyo it langis, sukot sa kuryente, ag iba pang nagapangunang gaeastuson nga nagapanaba sa purchasing power it mga trabahador.
Ginpamilit it grupo nga nag-abot sa 6.6% ro inflation sa Western Visayas ko Abril 2026, samtang kapin sa 7.2% man ro inflation nga naeksperyensiyahan it pinaka-pobre nga kabaeayan sa rehiyon.
Suno kanda nga maeayo ro P550 nga minimum wage sa ginaboeobanta nga P1,312 nga family living wage kada adlaw.
Ginpasaka it nasambit nga mga grupo ro bag-ong petisyon pilang buean bago matapos ro sang dag-on nga moratorium sa pagbaton it panibag-ong wage petition.
Ulihing ipinatuman ro wage increase sa Western Visayas ko Nobyembre 2025, kun sa siin nadugangan it P33 hasta P40 ro adlawan nga minimum nga sweldo it mga trabahador sa pribadong sektor sa Aklan, Antique, Capiz, Guimaras, Iloilo, ag Iloilo City.
