Nagnaba it 14 porsyento ro numero it mga turistang nagbisita sa Boracay ko Hunyo 2026 kumpara sa kaparehong buean ko nagtaliwan nga dag-on.
Suno kay Kathrine Licerio, administrative office it Boracay-Malay Municipal Tourism Office, nag-abot sa 177,228 ro kabilugan nga tourist arrivals umpisa Hunyo 1 hasta 30, mas manaba kaysa sa 205,310 nga nailista ko Hunyo 2025.
Pinakamaabu sa gihapon ro mga domestic tourist nga nag-abot sa 158,684, ginsundan it 15,165 nga dumueuong nga turista ag 3,379 nga Overseas Filipinos (OFs).
Gina angot ro pagnaba it tourist arrivals sa pagsueod it tiempo it tag-uean kasunod it pagtapos it peak season ko tag-init.
sa pihak kara, nagapabilin nga mataas ro numero it mga turistang nagbisita sa Boracay umpisa Enero hasta Mayo, rason agud nga maglista sa gihapon it pagtaas it kabilugan nga tourist arrivals sa unang katunga it 2026 kumpara sa kaparehong tiempo ko nagtaliwan nga dag-on.
Sa kabilugan nga numero it mga turistang nag-abot sa Boracay sa unang katunga it dag-on, 1,019,673 ro mga domestic tourist, 197,003 ro mga foreign tourist, ag 20,325 ro mga Overseas Filipino Workers (OFWs), nga nagapakita it padayun nga mataas nga interes it mga lokal ag dumueuong nga biyahero sa isla.
