Padayon ro imbestigasyon it Bureau of Fire Protection (BFP) Malinao sa sunog nga sangka panimaeay sa Sitio Agwantiya, kun sa siin posible nga naghalin ro kaeayo sa sangka solar-powered nga suga ukon gamit nga may rechargeable battery.
Suno kay O2 Jay Teodosio, nabudlayan sanda nga makaabot sa lugar bangud sa peligro sa pag-agi it saeakyan.
Bangud kara, gin aywanan nanda ro andang truck ag nagmotorsiklo eon paadto sa lugar it insidente, nga una sa mataas nga bahin it sitio ag mga apat hasta limang kilometro halin sa pangunahing karsada.
Sa pag-abot sa lugar, naabtan it mga imbestigador ro nasunog nga sangka palapag nga panimaeay nga ginatag-iyahan ni Mark Kevin Merano.
Suno sa asawa nana nga si Georgie Merano, imaw malang sa baeay tag natabo ro sunog.
Dugang ni O2 Teodosio, bisan uwa it koneksyon sa regular nga kuryente ro lugar, posible gihapon nga maghalin ro kaeayo sa mga gamit nga may baterya.
Ginpabug-atan it mga imbestigador nga ro bisan ano nga kagamitan nga may baterya ukon ginacharge mahimo magin paghalinan it init nga posible magtuga it sunog kon may deperensya.
Padayon sa makaron ro imbestigasyon it BFP Malinao agud makumpirmar ro eksaktong ginhalinan it sunog.
