KALIBO, Aklan — Posible nga sa 2027 pa mapondohan ro pagpa-obra it naeumpag nga portion it revetment wall sa Barangay Jumarap, Banga, Aklan .
Raya ro ginpahayag ni Barangay Kagawad Rodelyn Reyes, nagbueos sa pwesto it anang nagtaliwan nga mister nga si dating kagawad Rolando Reyes .
Suno kana nga raya ro ginpaabot it Department of Public Works and Highways (DPWH) Region 6 ko nagtaliwan nga buean it Mayo kadungan sa andang ginpatigayon nga ocular inspection sa lugar.
Owa pa sigon it available nga pondo para sa insigidang rehabilitasyon it nasambit nga imprastraktura, ag ginaeauman nga makataeana it alokasyon sa masunod nga budget year.
Ro revetment wall hay kaparte it 63-meter flood-control project nga ginpatigayon it DPWH ag natapos ko 2023.
Padayon man sigon ro pag-monitor it mga natungdan nga ahensya sa lugar, kun sa siin, nakaangkon it dugang nga assessment ag mga tikang agud malikawan ro mas grabeng peligro sa mga residente .
Ginpamilit ni Kagawad Reyes nga maskin sanda hay nagakabaeaka bangud nga pader lang ro pagitan sa andang baeay it nagakahugos nga portion it revetment wall.
Suno sa mga residente, eubus sanda nga nagakabaeaka kon makaangkon it mga mabaskog nga uean ag pagbaha ukon pagtaas it tubi sa Aklan River sa posibilidad nga eubusan nga mahugos ro revetment wall.
