Panibag-ong insidente it pagpang-harass halin sa Chinese Coast Guard (CCG) sa mga barko it Pilipinas ro nailista makaron nga adlaw it Biyernes, July 24, sa Bajo de Masinloc.
Suno kay Philippine Coast Guard (PCG) Spokesperson for the West Philippine Sea Rear Admiral Jay Tarriela, uman nga ginbombahan it tubi ag nagpatigayon it delikadong pagmaniobra ro CCG sa mga barko it PCG ag Bureau of Fisheries and Aquatic Resources (BFAR).
Raya hay natabu sa katung-anan it ginpatigayon nga paghatud it krudo ag iba pang supply para sa mga Pilipinong mangingisda.
Bago mag-alas-6:30 it agahon kat bombahan it tubi it CCG vessel 3107 ro BRP Cape San Agustin samtang nagapatrolya matapos bantayan it an-um nga barko it CCG ag pilang Chinese Maritime Militia vessels.
Nauman pa raya makataliwan ro sang oras kun sa siin ro CCG vessel 21581 ro nagbomba it tubi sa BRP Datu Paduhinog ag nagpaeapit pa sa distansiya nga pitong metro eamang ag bombahan it uman it tubi it daywang beses.
Suno pa kay Tarriela, naispatan man ro sangka Chinese Maritime Militia vessel nga nagabira it eubid sa likod it BRP Datu Sumakwel samtang ginabombahan man it tubi it CCG vessel 3303 ro BRP Datu Cabaylo bago mag-alas-9:00 it agahon.
Eowas man ro mga tawuhan it PCG ag BFAR ag napadayun gihapon ro paghatud it supply para sa mga Pilipinong mangingisda.
