KALIBO, Aklan — Nagapati ro sangka political observer sa Aklan nga posibleng indi masentensiyahan si Vice President Sara Duterte sa impeachment trial sa pihak nga may bastante nga basehan ag ebidensiyang ginplastar ro House prosecution.
Suno kay Atty. Harry Sucgang, dating provincial board member nga mas nagapangibabaw ro personal nga interes ag pulitika it pilang senator-judges kaysa sa pagtimbang sa mga alegasyong ginapangatubang it bise presidente.
Medyu pakitang-tao eon lang sigon ro pagserbisyo it pilang opisyal ag kueang ro pagpakita it malasakit kumpara sa mga naunang miyembro it Senado.
Ginpamilit man nana nga nakikita sigon ro pagiging bias it pilang senator-judges base sa andang mga manifestation ag mga kwestiyon sa pagpamati.
Ginpahayag dugang nga ro paghipos it magmaeanghud nga Mark ag Camille Villar, kamana man ni Senator Loren Legarda hay ginabantayan bangud sa posibilidad nga mag-ober-da-bakod ro mga raya sa majority sa magiging botohan.
Nagpaandam man imaw nga engkasong magabuhay pa ro impeachment trial hay posibleng maduea-an it interes ro publiko sa pagsubaybay sa pagpamati.
Sa makaron hay nakaangkon pa sigon it interes ro publiko angot sa isyu it grave threats.
Nagapati imaw nga nakasueod ro nasambit nga alegasyon kontra kay VP Sara Duterte sa mga grounds nga culpable violation of the Constitution ag betrayal of public trust.
Kadungan kara, nagpahayag imaw it pageaum nga indi mauli sa panibag-ong People Power ukon anumang bayolenteng kinagamo ro magging resulta it impeachment trial.
