Indi maganaba sa pitong katawo, kaibahan ro tatlong unga ro namatay matapos nga tamaan it drone ro sangka matawong beach sa Arkhipo-Osipovka sa Krasnodar region it southern Russia.
Suno sa mga awtoridad, nag-abot sa 40 ro naninahan kun sa siin, 17 ro padayun nga ginabueong sa ospital.
Gin-akusahan it gobernador it Krasnodar ro Ukraine nga ginpuntirya ro mga sibilyan, apang owa pa it pahayag ro Kyiv angot sa insidente.
Sa mga video nga nagkalhit sa social media, makitang bumagsak ro drone sa baybayon ag sumabog samtang maabu nga mga turista ro nagapaligos sa dagat ag nagapungko sa bibi it baybay.
Bukon pa it klaru kun ano ro target it drone. Suno sa pilang report, posibleng bumagsak raya sa beach matapos maapektuhan it electronic jamming ukon matamaan it air defense it Russia.
Base sa mga nakasaksi sa insidente, owa sigon it may nagtunog nga siren bago natabu ro pagsabog. May pilang testigo man ro naghambae nga nagpanago sanda sa likod it mga beach chair samtang ro iba man hay nakabati it sunud-sunod nga eupok bago ro mabaskog nga pagsabog.
Padayun ro pagbaeayluhan it long-range attacks it Russia ag Ukraine sa tunga it nagapadayun nga giyera. Sa nagtaliwan nga dag-on, ginpaeapad it Ukraine ro mga pag-atake sa sueod it teritoryo it Russia nga nakasentro sigon sa imprastraktura ag mga pasilidad nga may kaangtanan sa militar it nasyon.
