KALIBO, Aklan—Eubus nga ginkalipay it lokal nga gobyerno it Kalibo ro uman nga pagkilaea bilang Best Booth sa ginpatigayon nga ika-37 Philippine Travel Mart sa SMX Convention Center.
Suno kay Carla Doromal, executive assistant to office of the mayor, napabilin it Kalibo ro pagiging kampeon halin kat una raya nga nagpasakop sa mabahoe nga event.
Naging posible ro andang pagdaog bangud sa kahugod, talento ag dedikasyon it andang team sa pagbilog it booth nga ginpresentar ro bugana nga kultura ag tradisyon it Kalibo.
Ginpakita sa booth ro mga produktong himo sa ginhaboe nga piña fiber, nga nagasaeaming sa kamayad it mga lokal nga manughaboe kamana man ro mainit nga pagbaton sa mga bisitang nagtambong sa travel expo.
Dugang pa ni Doromal, magaserbing inspirasyon ro nasambit nga pagkilaea agud padayon nga itib-ong ro kultura ag turismo it banwa.
Nagapasaeamat man suno kana ro LGU Kalibo sa Philippine Tour Operators Association (PHILTOA), sa mga master weaver, ag maabong iba pa sa andang pagpasakop sa Philippine Travel Mart.
