Ginmandu it National Bureau of Investigation (NBI) nga imbestigahan ro pagkamatay it sangka babaye nga gina-alegar nga nagpaidaeum sa pilang plastic surgery procedures sa sangka clinic sa San Juan City.
Nagpangayo it bulig sa NBI ro unga it biktima nga si Ronn Tristan Perez, sangka Filipino-American reality TV star nga nakabase sa Estados Unidos.
Suno kay Perez, nagpaidaeum ro anang ina sa ap-at nga cosmetic procedures ko Marso 2—kaibahan ro liposuction, Brazilian butt lift, tummy tuck ag BodyTite para sa mga butkon. Nag-abot sigon sa P570,000 ro gastos ag ginpatigayon ro nasambit nga mga procedure sa sueod it pitong oras.
Ginpahayag pa ni Perez nga naging maeupsi ro anang ina matapos ro operasyon ag makataliwan ro pilang adlaw hay nakabaton imaw it tawag nga nagahambae nga namatay eon raya.
Ginpangayo sigon nana sa clinic ro kumpletong medical records it anang ina apang owa nana nabaton ro tanan nga mga dokumentong gusto nana nga makita.
Ginpamilit ni Perez nga owa imaw direktang nag-akusa sa sin-o man, apang gusto eamang nana nga masiguro pinaagi sa imbestigasyon ag mga dokumento kun nasunod ro tanan nga kinahangeanon nga proseso ag pag-dahan.
Padayun pa nga gina-imbestigahan it NBI ro insidente.
