Ginpakigbahin it award-winning actor nga si Aga Muhlach ro anang gin-agihan nga fitness journey nga nagresulta sa mabahoe kara nga pagbawas it timbang.
Suno kay Aga, nag-umpisa imaw nga magpaniwang ko Oktubre 2025 ag naging consistent sa anang diet ag ehersisyo hasta sa makaron.
Regular imaw nga naga-gym kada Lunes, Miyerkules ag Biyernes, mag-eowas pa sa cardio ag biking. May instructor man imaw nga naga-agto sa andang baeay para i-guide imaw sa anang workout.
Gin-aku it aktor nga kinahangean nana nga bawasan ro anang mga social activities para mapabilin ro anang programa sa pagpaniwang.
Suno kana nga naduea-an imaw it social life bangud nga mas naging masako imaw sa pagbisikleta, pag-gym ag oras kaibahan ro anang pamilya.
Nagpamalibad man sigon imaw sa kaabuan it mga imbitasyon sa dinner. Kon mag-attend man, sang oras eamang imaw nagapabilin bangud nga owa imaw naga-inom ag may daea imaw nga kaugalingon nga pagkaon.
Samtang, ginpahayag ni Aga nga owa man nana eubusan nga gintalikdan ro anang mga paboritong pagkaon. Sa baylo, calorie counting ag calorie deficit ro anang naging nagapangunang pamaagi, kadungan it regular nga ehersisyo.
Suno sa aktor, importante ro consistency sa pagkaon ag workout agud nga mas madasig nga maangkon ro target nga pagbawas it timbang.
