Ginpahayag it prosekusyon makaron nga Lunes nga indi eon kara pag-tawgon si Vice President Sara Duterte agud mag-testigo sa impeachment trial.
Gintaeana bilang ulihing testigo it prosekusyon si financial forensic analyst Atty. Alex Cabrera.
Suno sa tagapaghambae it prosekusyon nga si Atty. Jay Tolosa, bastante eon ro mga dokumento, kaibahan ro mga rekord it bangko ag tax filings it bise presidente, agud suportahan ro anang mga alegasyon.
Una eon nga gin-tun-an it prosekusyon ro posibilidad nga magpaguwa it subpoena kay Duterte, apang ginkwestyon man kun pwede rayang piliton nga magsabat sa mga kutana.
Samtang, ginhambae ni House prosecutor Rep. Joel Chua nga pwedeng ieakip it depensa si Duterte bilang testigo agud mapaathag ro mga isyung ginapangatubang kara.
Nauna man nga ginpamilit it bise presidente nga gina-dali ro impeachment trial ag naga-imbento sigon it ebidensiya ro prosekusyon.
Ginhinyo man ni Tolosa sa impeachment court nga usisaon ro posibleng pageabag sa sub judice rule, nga nagalimita sa mga pahayag it mga partido angot sa kasong nakahathat sa hukuman.
