KALIBO, Aklan — Ginhatud eon sa anang ulihing paeahuwayan, agahon it Sabado, Nobyembre 21 ro 27 anyos nga si Angelica Miguel it Barangay Mandong, Batan kasunod it anang kontrobersyal nga kamatayon ko Oktubre 24 sa Dr. Rafael S. Tumbokon Memorial Hospital.
Madumduman nga si Angelica hay namatay matapos madiskubrehan nga owa eon it kabuhi ro pitong-buean nga eapsag sa anang tiyan .
Gin-akusahan it pamilya ro mga hospital staff it gina-alegar nga kapabayaan ag pag-delay sa pagpatigayon it cesarean section.
Nauna eon nga ginpamalibaran it mga doktor nga naka-duty ro alegasyon ag gin-insister nga ginsunod nanda ro mga ginapatuman nga medical protocols.
Bago ro anang eubong, ginpaguwa ro eapsag sa anang tiyan ko Nobyembre 11 ag ginbutang sa anang kilid sa sueod it kabaong.
Padayun nga naga-usoy it hustisya ro pamilya ag nagsumite eon it reklamo sa Department of Health (DOH) agud nga maghinyu it independent investigation sa insidente.
Sa ginpatigayon nga eubong , nakasuksok ro pamilya it puti nga eambong nga may naka-imprintang mensaheng “We Demand Truth and Justice for Angelica.”













