KALIBO, Aklan – Plano it inter-agency task force nga maggamit it access cards sa mga turistang magasueod sa Boracay.
Raya hay agud ma-monitor ag makontrol ro numero it mga magasueod nga turista sa sikat nga isla.
Suno sa Department of Environment and Natural Resources (DENR), kapin sa 54,000 ro carrying capacity it isla kada adlaw kon siin 19,000 kara ro mga turista.
Para man kay DENR Secretary Roy Cimatu, kinahang-ean anay nga magparehistro it mga turista sa idaeom it sangka sistema agud masayuran kon pilang adlaw sandang magapabilin sa Boracay.
Ro entry ag exit data hay igabutang sa capacity management system nga regular nga iga-monitor it regulators.
Obligado man nga magparehistro ro mga magasueod nga residente it Boracay ag banwa it Aklan, kamana man ro mga empleyadong makaangkon it seperadong website nga pagataw-an it access cards.
Ginaeaumang paga-istoryahan kon sin-o ro magapatuman it sistema ag san-o raya magiging epektibo.
Apang suno kay Cimatu, sa Oktubre 15 pa masayuran kon paano igapatuman ro sistema kadugang it pagahimuong dry run.
Bangud sa bukon pa it maayos ro mga karsada sa isla, pagagamiton anay ro front beach it mga magasueod sa Boracay.
