Kasunod it uman nga pagkabaeaka, mas ginhugtan ro screening measures sa Asya kasunod it outbreak it makamaeatay nga Nipah virus sa West Bengal state sa India.
Sa Thailand, gin-umpisahan ro pag-screen sa tatlong mga paeuparan kun sa siin may flights nga halin sa West Bengal.
Sa Nepal, may screening man sa naga-abot sa Kathmandu airport ag sa iba pa nga land border points sa India.
Daywa eon ro kumpirmado nga kaso it nasambit nga baeatian sa West Bengal umpisa ko Disyembre. Kapin sa 196 man nga katawo ro na-trace nga nakaangkon it close contact apang nag-negatibo sa virus.
Ro nasambit nga virus hay pwedeng magtapon sa sapat kapareho it baboy ag kabog paagto sa tawo. Mahimo man raya nga magsaylo halin sa tawo paagto sa sambilog pang katawo kun nakontamina ro pagkaon.
Mataas ro death range kara halin sa 40% pasaka sa 75%, bangud owa pa it bakuna ukon bueong.
Ginlista raya it World Health Organization (WHO) nga naeakip sa top ten priority diseases kaibahan ro Covid-19 ag Zika bangud sa potensyal kara nga makatuga it epidemic.
Eakip sa sintomas it baeatian hay ro eagnat, pagsakit it ueo, muscle pain, ag pagsakit it tutunlan nga posibleng sundan it pneumonia, ag mahimo man mag-resulta sa encephalitis para sa mas grabe nga mga kaso.
