KALIBO, Aklan—Bilang nagapanguna nga player makaron it San Juan Knights sa Maharlika Pilipinas Basketball League ukon MPBL D-League Juniors 21-under, pagatinguhaan it 19 anyos nga Akeanon basketball player nga maging professional basketball player ag makasueod sa PBA.
Sa interview it Bombo Radyo, ginpahayag it 5’11 nga si John Daniel Guarino nga mas kilaea man bilang JD Guarino nga makaron pa eamang hay todo eon ro anang praktis ag disiplina sa kaugalingon agud nga maabot ro handum.
Sa edad nga an-um hay natun-an sigon nana nga palanggaon ro hampang sa bulig it anang ama.
Nagpasakop man sigon imaw sa Philippine Super Liga kat ginrepresentar ro Tarlac kun sa siin gindeklara nga kampeon ro andang team ag imaw ro finals MVP ag nag-mythical 5 sa bilog nga Luzon.
Nakahampang man imaw sa NCAA sa idaeum it JRU Light Bombers Juniors Division.
Sa edad nga waeong dag-on hay nakahampang man imaw sa batang PBA.
Samtang, bilang sangka first year college student, may pilang universities sigon nga naga-offer kana agud nga maging varsity player apang ginapag-isipan pa nana.
Kaibahan pa sa plano nanda it anang ama ro maka-uli sa aklan ag makahampang sa governors cup agud nga mai-representar ro banwa it Banga.
Nasayuran nga si Guarino hay halin sa pamilya it mga mayad nga basketball player sa Brgy. Badiangan, Banga, Balete ag Altavas.
