KALIBO, Aklan—Ginpasaeamatan ag gindayaw ni Aklan 2nd District Congressman Ted Haresco ro mga ginakabig nga frontliners sa probinsiya sa pagtinguha nga matapna ro Coronavirus Disease 2019 (COVID-19).
Suno kay Cong. Haresco nga eubus ro anang pagpasaeamat sa tanan nga mga frontliners nga nagasukoe ag nagabuwis it andang kabuhi agud nga masiguro eamang ro kaeowasan it mga pumueuyu halin sa makamaeatay nga virus.
Sa 12 nga kaso it COVID-19 sa Aklan, owa suno kana it namatay rason nga nagbuhi raya it joke nga ro dugo it Akeanon hay mas mabagsik pa sa COVID.
Ginkalipay man nana nga owa it nailistang local transmission sa probinsiya.
Umani suno kana it pagdayaw ro lokal nga gobyerno it Aklan halin sa Departmemnt of Health bangud sa pagsabat sa COVID-19 crisis.
Nakataeana man suno kana nga pagabuksan ro infectious disease center nga nahamtang sa Aklan Provincial Hospital nga indi eamang magatratar sa mga pasyente nga may COVID kundi pati man ro dinapuan it dengue, tuberculosis ag iba pa.
Kadungan kara, nag-apela imaw sa mga katapo it media nga indi masyadong i-sensationalize ro mga balita nga maka-apekto sa pagbangon it industriya it turismo sa Boracay.
Ginhalimbawa nana ro natabu sa sangka firewoman nga na-assign sa Bureau of Fire Protection ukon BFP Region 6 nga nagbakasyon sa isla nga napabalita nga nag positibo sa COVID-19 , kun sa siin, ko ulihi hay puro nag negatibo ro resulta it RT-PCR test it mga nakaibahan kara ag pati ro nasambit nga firewoman.
Samtang, maskin nga balik eon suno kana sa new normal, padayun nga ipatuman ro physical distancing, pirmeng pag hugas it alima ag magsuksok it virus.
