KALIBO, Aklan—Ginduea man it probinsiya it Aklan ro ginpatuman nga restrictions sa andang borders sa kaiping nga mga probinsiya it isla it Panay.
Suno kay Governor Florencio Miraflores nga ko Miyerkules nga adlaw hay nagpaguwa imaw it anang Executive Order may kaangtanan kara.
Uman sigon nga ginbawi ro border restrictions bangud nga una eon sa modified general community quarantine ro haeos tanan nga mga probinsiya sa Western Visayas.
Apang, nagapabilin suno kana nga instrikto ro tanan nga mga entry points, kun sa siin, ro tanan nga mga nagasueod sa Aklan hay ginapaidaeum sa profiling para sa madali nga contact tracing.
Kinahangean suno kana nga ipa-rehistro nanda ro detalye angot sa andang mga kaugalingon ag mga kaibahan sa saeakyan.
Samtang, gina-require man sa mga public utility vehicles ag mga buses ro pagsumite it andang passenger manifest.
Sa pag-agi sa checkpoint hay gina-usisa sigon it mga border personnel kon ginasunod ro minimum public health standards kapareho it pagsuksok it face mask ag physical distancing.
Ginpadumdum pa it gobernador ro publiko nga maskin nga bukas eon ro borders sa isla it Panay ag may free movements eon ro mga tawo hay una sa gihapon ro peligro nga matapnan it virus bangud nga owa pa it bakuna nga makabueong kara.
