KALIBO, Aklan—Personal nga nagpanuma si Aklan Gov. elect Jose Enrique Miraflores kay Pangueong Rodrigo Duterte sa Malacañang ko Lunes nga adlaw.
Kaibahan sa oath-taking si dating pangueo ag makaron hay Pampanga Representative Gloria Macapagal-Arroyo ag iba pang elected ag re-elected local officials.
Sa interview it Bombo Radyo, ginpahayag ni Miraflores nga mabahoe nga dungog para kana nga makaibahan sa mga gin-imbitahan.
Kaibahan sigon imaw sa 14 nga mga gobernador nga imbitado.
Raya hay nagapakita eamang sigon nga gintaw-an it importansiya it Duterte administration ro Aklan.
Sa diskurso sigon it pangueo, ginpasaeamatan nana ro mga opisyal nga nagtau it suporta sa anang pagpanerbisyo nga nakataeana eon nga magatapos sa Hunyo 30.
Sa pihak kara, ginkumpirma ni Miraflores nga makaangkon gihapon imaw it pagpanumpa kaibahan ro mga kapartido nga nagdaeaog ko nagtaliwan nga eleksyon sa hapon it Hunyo 27 sa ABL Sports and Cultural Complex.
Magiging dinapit sigon nga bisita kara si senate president Migz Zubiri.
Samtang, makaangkon man suno kana it simpleng seremonya sa Hunyo 30 sa provincial capitol sa pormal nga pagpungko kara sa pwesto bilang gobernador nga magabueos sa anang ama nga si outgoing governor Florencio Miraflores.
Naging maeumo sigon ro transition sa tunga nanda it anang ama kun sa siin hay naumpisahan eon nana ro meetings sa mga nagkaeain-eain nga department heads it kapitolyo.
Plano man nana nga tutukan sa unang 100 days sa anang pwesto ro pagpabaskog sa social services, agrikultura ag turismo nga makatau it dugang nga pangabuhian sa mga pumueuyu.
Ginpasiguro man nana nga paga-ayuson pa ro operasyon sa Aklan provincial hospital eabi eon ro pagtau it importansiya sa mga hospital staff ag mga kinahangeanon it mga pasyente.
Igapabatyag sigon nana sa tanan ro serbisyong Joen nga anang ginpromisa ko tiempo it kampanya.
Nasayuran nga si governor elect Joen Miraflores ro pinakabata nga nailihir sa posisyon sa kasaysayan it Aklan.
