Nagpaandam ro Aklan Police Provincial Office (APPO) sa mga opisyal ag residente it probinsiya it Aklan kontra sa scam gamit ro pangaean ni provincial director P/Col. Esmeraldo Osia, Jr. agud nga makapangayo it mobile phone load.
Suno kay P/Corporal Jane Vega, tagapaghambae it APPO nga sangka manugloko nga eaeaki nga nagpakilaeang provincial director ro tumawag kay Makato Mayor Avencio Torres agud nga magpangayo it bulig nga maka-usoy it contractor para sa igapatindog nga baeay sa nasambit nga banwa.
Insigida nana nga gintau ro numero it kakilaeang contractor sa nagpakuno-kuno nga si P/Col. Osia.
Sa pag-istorya it daywa, nagpangayo sigon ro caller it limang tig-P500 nga load.
Sa pagduda, nag-alibi sigon ro contractor nga hinduna lang magapadaea bangud nga owa it baraka nga mabak-ean it prepaid card.
Naakig sigon ro anang kaistorya ag ginpaandaman imaw.
Bangud sa natabu, nagdangop si Mayor Torres sa andang chief of police nga si P/Major Belshazzar Villanoche ag ginkumpirmang bukon it hilimuon it andang provincial director ro magpangayo it load.
Angot kara, gin-engganyo ni Vega ro publiko nga insigidang magsugid sa andang taeatapan ukon sa iba pang law enforcement agency.
