KALIBO, Aklan—Matapos ro temporaryong pagpasarado sa molecular laboratory it probinsiya it Aklan kasunod it pag-positibo sa coronavirus disease 2019 ukon Covid 19 it kaabuan sa mga staff kara, gin hinyu ni Aklan Gov. Florencio Miraflores sa Department of Health ukon DOH region 6 nga taw-an it prayoridad ro mga swab specimen sample nga halin sa Aklan nga gina-test sa Western Visayas Medical Center partikular ro swab sample it mga medical frontliners.
Suno kay Aklan provincial administrator Atty. Selwyn Ibaretta nga tuyo kara nga insigidang masayuran sa mas madali nga tiempo ro mga nagpositibo sa sakit agud nga makapatigayon it contact tracing ag mabaeabagan ro mas pang pagkalhit it deadly virus.
Ginalikawan sigon nanda nga magtaas pa ro local transmission agud nga indi maka-apekto sa plano nga pagbukas it Boracay sa domestic ag foreign tourists sa Oktubre 1.
Apang engkaso nga magtinaas pa ro covid positive sa probinsiya ag makasueod eon sa Boracay hay posibleng mapilitan si Governor Miraflores nga ipaiway ro grand opening kara.
Sa pihak nga parte, kampante ro provincial government sa ikasarang it mga staff it molecular laboratory bangud nga nag-agi sigon ro mga raya sa maid-id nga pag-training nga sangka requirements agud nga mataw-an it accreditation it DOH.
