KALIBO, AKLAN — Naga-apaw ro kasadya ag haeos inde makapati nga maga-perform sa Hollywood.
Raya ro ginpahayag it 22-anyos nga Aklanon singer nga si Ville Nor Lomugdang Villanueva matapos nga mapilian bilang official contestant sa kompetisyon it World Championship of Performing Arts (WCOPA), sangka global singing competition nga mas kilaea man sa tawag nga “The Talent Olympics” sa kategoryang Vocals Senior sa maabot nga Hunyo 30 hasta it Hulyo 9, 2017 sa Long Beach, California, USA.
Si Ville Nor hay naga-eskwela sa Conservatory of Music sa University of San Agustin sa Iloilo City.
Suno kana nga ko nagtaliwan nga dag-on hay nag-audition imaw sa nasambitang kompetisyon ag maswerteng nabaton.
Samtang, bukas sigon imaw sa sin-u mang interesadong magbulig kana kapin eon sa mga Aklanon designers nga magadesinyo sa anang costume.
Nag-apela man imaw it moral ag financial support sa kaparehas nga Aklanon.
Nasayuran nga ro recording artist nga si Jed Madela ro kauna-unahang Filipino nga nakaangkon it top prize sa nasambitang kompetisyon ag sa makaron hay napabahin sa Hall of Fame bangud sa multiple awards nga nabaton ko nagtaliwan nga mga dinag-on.
