NATIONAL News — Kaeabanan sa publiko makaron hay nakabatyag it kaakig bangud sa mga nagakalhit nga litrato kun sa siin nakit-an si dismissed Bamban, Tarlac Mayor Alice Guo nga todo-yuhum ag waea-tuo ro posing kaibahan ro mga opisyal it Pilipinas nga nagsueang kana pauli sa nasyon matapos nadakpan it mga otoridad sa Indonesia makaron nga domingo.
Eakip sa nataeupangdan hay ro litrato it “groupfie” ni Guo ag National Bureau of Investigation (NBI) ag Bureau of Immigration (BI) escorts nga kaibahan nana sa saeakyan.
Maabu nga netizens ro nag-react bangud nga matsa ‘chill’ eang si Guo ag ro mga nagsueang kana nga kapareho sa sangka road trip ro andang ginhimo.
Ginsundan pa raya it picture kun sa siin makita si Guo sa tunga ni Department of the Interior and Local Government (DILG) Secretary Benhur Abalos ag Philippine National Police (PNP) chief General Rommel Francisco Marbil.
Naka-peace sign pa ro dismissed mayor ag pareho sanda nga all-smiles samtang nagapungko sa couch.
Kaibahan ro nasambit nga mga litrato sa mga videos kat gin-turn over si Guo it Indonesian authorities sa Philippine officials.
Sa pagkita ni Guo ag Abalos, gintamyaw raya ni Alice it “Hi, Sec… (pangamusta) Nagkita na ‘po tayo before. Sa Tarlac po…. Sec, patulong, may death threat po kasi ako.”
Angot kara, nagpaguwa it pahayag si Senator Risa Hontiveros matapos ro nagkalhit nga mga pictures: “PAALALA lalo na sa mga kawani ng gubyerno: Si Alice Guo ay pugante. May kasong human trafficking. Hindi po ‘yan celebrity.”
Nauna eon nga ginbulgar it NBI nga si Guo hay ro Chinese national man nga si Guo Hua Ping nga gina-angot sa iligal nga Philippine Offshore Gaming Operators (POGOs).
Samtang mainit ro anang pangaean sa nasyon bangud sa imbestigasyon it Senado ag mga ahensya it gobyerno, naglayas imaw sa Pilipinas kaibahan ro anang igmanghud nga si Sheila ag Wesley Guo ag si Cassandra Li Ong ko Hulyo 2024.
Una nadakpan sanday Sheila ag Ong sa Batam, Indonesia ko Agusto 20 ag gindaea-pauli sa Pilipinas ko Agosto 22.
Miyerkules it agahon kat maaresto si Alice Guo sa Tangerang City samtang gina-usoy pa ro anang igmanghud nga si Wesley.
Eakip sa pending criminal complaints kontra kay Alice Guo sa Department of Justice hay ro qualified human trafficking, tax evasion, ag money laundering.
Makaron nga adlaw, nagpaguwa man ro Tarlac Regional Trial Court Branch 109 it arrest warrant kontra sa dismissed mayor angot sa kaso nga graft partikular sa pag-eabag sa Section 3(e) ag 3(h) it Republic Act 3019 ukon ro Anti-Graft and Corrupt Practices Act.
