KALIBO, Aklan—Ginapasugtan eon ro angkas sa motorsiklo para sa mga mag-asawa kasae man ukon mag live-in partner.
Suno kay Police Major Bellshazzar Villanoche, hepe it Kalibo Police Station nga nakabaton sigon sanda it memorandum maghalin sa andang higher office kaangot sa pagpasugot sa angkas.
Apang, kinahang-ean nga sundon it mga raya ro requirements nga gintaeana sa guidelines.
Mag-eowas suno kana sa mandatory nga pagsuksok it facemask ag helmet, kinahang-ean nga may harang sa tunga it driver ag backrider.
Raya hay sangka prototype nga barrier nga ginproponer it gobyerno it Bohol.
Agud nga maka-avail sa excemption sa angkas hay sundon eamang ro mga requirements bangud nga ginapasugtan eon raya sa makaron it national IATF.
Madumduman nga maabong Local Government Unit ukon LGU’s nasyon ro nagaduso nga pasugtan ro angkas bangud sa kakueangan it public transportation ag kamahae it pamasahe.
