KALIBO, Aklan—Sangkiri nga nagnaba ro ani it paeay it mga mangungguma sa probinsiya it Aklan.
Raya hay sa atubang it pag-umpisa it harvest season.
Suno kay Ms. Salome David it Office of the Provincial Agriculturists nga inatake sigon it mga eanggam ro mga pananum nga paeay it mga mangugnguma mag-eowas pa sa sobrang kataason it presyo it abono ag bayad sa labor.
Raya sigon ro rason kon ham-an nga masyadong nagakalisod ro maabu nga mga mangunguma.
Base sa pinaka-ulihing datos it taeatapan sa “yield performance per hectare” base sa ginsumite nga report it mga municipal agriculturists, naga-abot eamang sa 80 cabans per hectare ro posibleng maani nga paeay kabaliskaran sa andang target nga 100 to 110 cabans kada ektarya.
Sa pihak kara, ginkumpirma ni David nga haeos 10% pa eamang it kabilugan it gintamnan nga kaeanasan ro natigayon nga ma-harvest sa bilog nga probinsiya.
Nasayuran nga kapin sa 14,776 nga ektarya it kaeanasan ro gintamnan umpisa ko Mayo hasta Hulyo.
Ginaeauman suno kana nga sa Oktubre hay maani eon ro tanan nga mga paeay nga gintanum.
Sa pihak nga parte, ginkalipay it taeatapan ro pagtaas sa presyo it pagbakae it paeay it mga local traders.
Suno kay David nga ro presyo it eabtong nga paeay makaron hay nagahampang sa 16 to 19 pesos kada kilo samtang ro uga hay 20 hasta 21 pesos kada kilo.
Mas mataas sa pagpamakae it National Food Authority ukon NFA nga 19 pesos per kilo.
Hugut sigon nanda nga ginabantayan ro presyuhanay bangud nga kon manaba ro baeak-ean hay dikara nagasueod ro gobyerno probinsiyal agud nga malikawan ro pagkalugi it mga rice farmers.
Ginpahayag dugang nga mabahoe ro posibilidad nga maganaba ro nasambit nga presyo kon mag-abu ro supply apang ginpasiguro nga una sanda nga nakabantay.
Sa makaron hay gin-amyendahan nanda ro andang ordinansa nga nagataeana sa presyo it ginabakae nga paeay.
