MALAY, Aklan — Hugut nga ginapatuman sa banwa it Malay ro Anti-Epal Policy, kun sa siin ginabawae ro pagbutang it pangaean, litrato, logo, slogan, ag anumang personal branding it mga opisyal it gobyerno sa tanan nga proyektong ginpondohan it gobyerno.
Raya ro ginpahayag ni Caticlan Punong Barangay ag Liga ng mg Barangay President – Aklan nga si Rannie Tolosa.
Suno kana antes pa man ro ginpatawag nga pueong it lokal nga gobyerno it Malay sa tanan nga mga punong barangay sa nasambit nga banwa may daywang domingo eon ro nagtaliwan agud nga talakayon ro ginpaguwa nga memorandum circular it Department of the Interior and Local Government (DILG) hay ginapatuman eon nanda ro nasambit nga mandu.
Sakop kara ro mga karatula ag marker it building, mga relief goods ag school supplies, ambulansya ag iba pang saeakyan it gobyerno, pati man ro mga opisyal nga social media, brochures, ag tarpaulin.
Nakabutang kara nga tanan nga public officials, nailihir man ukon nabutang sa pwesto hay indi dapat makita ro mga itsura sa mga proyekto, kapareho it struktura, pasilidad, kagamitan, mga saeakyan ukon dokumento nga ginpondohan halin sa buwis it mga pumueuyu.
Nasayuran nga ro sin-o man nga maga-eabag hay posibleng makasuhan it administratibo, sibil, ukon kriminal sandig sa ginapatuman nga laye.
