Kalibo Aklan —–Ginpaabot it Aklan Police Provincial Office (APPO) sa publiko nga indi pag-abusuhon ro gintau nga kahigayunan nga hilway eon nga makaguwa sa andang mga panimaeay sa idaeum it Extended General Community Quarantine sa bilog nga probinsiya it Aklan.
Suno kay PSSgt. Jane Vega , tagapaghambae it APPO nga mataeupangdan makaron ro uman nga pag-abu it mga saeakyan ag naexperiensiyahan nga gutok nga trapik sa pilang lugar.
Sa makaron suno kana hay una eon sa adjustment period it ginatawag nga ‘new normal’.
Sa pihak kara, dapat nga pirmeng isipon nga nagapabilin ro COVID-19 rason nga dapat nga sundon ro mga safety measure.
Partikular kara ro pagsuksok pirme it face mask ag pagsunod sa social distancing.
Gindugang pa ni Vega nga ginbungkag eon ro quarantine checkpoint ag nagapatigayon makaron it regular checkpoint.
Hugut sigon nga ginabantayan kara ro mga naga-eabag sa traffic rules and regulations ag mga colorum nga saeakyan .
Ginatutukan man ro mga pampasaherong saeakyan ag ro angkas sa motorsiklo agud nga masiguro nga nagasunod sa social distancing.
Samtang, matapos nga ginbawi ro liquor ban, nataeupangdan man suno kana ro pagtuhaw eon man it mga vehicular accident .
Sa pihak nga parte, ginpasiguro it APPO nga hugut nga ginabantayan ro mga nagasueod sa Aklan nga delivery truck .
Ginabutangan sigon it sticker ro kada pwertahan agud nga mabantayan kon nagguwa ro driver ag pahinante kara .
Engkaso nga obligado nga magpanaog hay kinahangean nga nakasuksok it PPE ag 12 oras eamang ro required nga magtinir sa sueod it probinsiya .
