KALIBO, Aklan—Nag-apela ro Ati community sa banwa it Numancia nga likawan ro diskriminasyon ag likawan ro saea nga akusasyon kanda.
Raya hay kasunod it pagpasibangud nga sanda ro responsabli sa mga nagakatabu nga pagkaduea it mga alagang kasapatan maeapit sa andang gina-istaran nga Ati village sa Brgy. Aliputos, Numancia.
Suno kay Rosita Pizaro, tribal leader nga matapos nga ginsaylo sanda it ilistaran halin sa barangay Bulwang ag Laguinbanua, Numancia hay nagkalhit ro nasambit nga mga pagpasibangud matapos nga tiempo man nga may mga kasapatan nga nagkaduea.
Ro pagpanakaw suno kana hay makabig nga mabug-at nga akusasyon nga nakakasamad sa andang pagkatawo eabi pa kon owa it nagakaigo nga baeasihan ukon ebidensiya.
Ginhangkat man nana ro mga nagapasibangud kanda nga magpa-barangay agud nga mapatawag ag mapa-atubang ro natungdan nana nga nasakupan.
Ginasugid nga sangka tawo nga may dark complexion ukon maitom nga pamaniton ro gina-alegar nga suspek.
Maskin sigon ro pag angkon it mga motorsiklo ag cellphone it andang ibang nga miyembro hay gintaw-an it ibang kahueugan.
Suno kana nga nagatinguha sanda nga magtrabaho agud nga makabakae it andang kinahangeanon ag malikawan nga magpangayo-ngayo.
