Bilog nga pagpainubuson ro pagbaton ni dating Presidential spokesperson Atty. Harry Roque sa desisyon it Korte Suprema.
Raya hay matapos nga pamalibaran it korte ro ana nga ginapangayo para sa writ of amparo o special protection order kuntra sa contempt ag arrest order it House Quad Committee nga nagapanguna sa pag-imbestiga sa mga illegal POGOs, extrajudicial killing, ag iba pang krimen sa idaeom it nakataliwan nga Duterte administration.
Sa sangka statement, ginhambae ni Atty. Roque nga nagasalig pa imaw gihapon nga igapadayon it mataas nga korte nga tan-awon o ikonsidera ro pila sa andang petisyon kung siin nagapanindugan sigon sanda nga uwa eon na in aid of legislation ro ginhimo nga imbestigasyon it komite.
Nagasalig man ro kampo ni Roque nga magadihon ro Kamara de Representantes it komento kara sa gintao nga period it korte para sa insigida nga pagresolba it anang petisyon.
Presente eon nga may arrest order ro House Committee kuntra kay Roque matapos ma-cite in contempt kat nagpamalibad raya nga magsumite it mga ginapangayo nga dokumento para ipaathag ro gulpihan nga pag-abo it anang manggad nga ginaangot sa ilegal nga operasyon it POGO.
