BALITA Espesyal–Sangka ginang sa Spain ro nakabaton it mabahoe nga danyos bangud sa maisot nga bato nga nagbara sa anang mata sa sueod it 54 anyos!
Ko 1965, nagahampang kato ro 8-anyos nga si Domi sa andang garden.
Ginahampangan nana ro andang asaroe kat tamaan ro sangka mabahoe nga bato.
Napulbos ro bato ag may maisot nga parte kara ro tumama sa anang waea nga mata.
Naging grabe ro pagdugo kara apang kat daehon imaw sa doktor, owa it nakitang damage sa anang panan-awan ag owa man it nakitang bato.
Umpisa sa edad nga 9 hasta 27, owa imaw it naexperiensiyahan nga problema sa anang panan-awan apang nababatyagan nana ro bato sa anang mata.
Pag-abot it edad 28, nakaexperiensiya eon imaw it pagsakit sa waea nga mata apang bangud nga owa it makita ro doktor nga problema, ginhambaea imaw nga magpatan-aw anay sa psychiatrist bangud nga basi mental health problems ro rason kara.
Ko 1996, may nakitang kakaiba sa ultrasound ag CT scan sa anang mata apang na-misdiagnose raya bilang cyst rason nga owa man nasolusyunan.
Naga abot eon sa 20 nga eye specialist ro anang ginpakonsultahan apang ro tanan hay owa it nakitang bato sa anang mata.
Pag abot it 2019, nagpaidaeum imaw sa sangka surgical procedure sa Badajoz, Madrid ag idtu natukiban ro maisot nga bato ukon pebble sa anang mata.
Gin-operahan imaw ag nabo-oe ro pebble.
Ko nasambit man nga dag-on hay nagpasaka imaw it kaso kontra sa Extremedura Health Service bangud sa pilang beses nga saea nga diagnose sa anang problema sa mata.
Ginpaburan it korte si Domi ag ginbayaran imaw it danyos nga nagabalor it 90,000 euros.
