KALIBO, Aklan—Ginpaathag ni Atty. Roberto Salazar, Aklan provincial Comelec supervisor nga ro pagdihon it Certificates of Candidacy ukon COC hay nagaserbi man nga ceremonial opening it election season sa nasyon para sa May 2025 national and local elections.
Angot kara, anang ginpasiguro nga preparado ro andang taeatapan sa pagbaton it mga naga-aspirar nga magpadaeagan para sa mga posisyon nga congressman, governor ag vice gobyerno kamana man sangguniang panlalawigan members.
Ginpahayag ni Atty Salazar nga umpisa Oktubre 1 hasta 8, umpisa alas-8:00 it agahon hasta alas-5:00 it hapon hay magabaton sanda it COC’s ag Certificates of Nomination and Acceptance ukon CONA, basta nga tama ro andang pag-sueat sa form.
Ro venue hay ginsaylo sa audio-visual room it Aklan State University Kalibo campus.
Gin-uman it provincial Comelec supervisor nga dapat nga likawan it mga magapa-ilihir kaibahan ro andang mga tagasuporta nga obrahon nga matsa fiesta ro pagdihon it COC.
Ro sangka kandidatu hay pwede eamang nga magdaea it hasta maximum nga tatlong kaibahan.
