KALIBO, Aklan—Ginaeauman nga uman nga mapabaskog ro pagbueuligan it kapulisan ag komunidad matapos ro ginpatigayon nga pagpanumpa it mga bag-ong miyembro it Municipal Advisory Group for Police Transformation and Development sa banwa it Kalibo.
Ginpaathag ni sangguniang bayan member Augusto Tolentino, sambilog sa mga miyembro it nasambit nga advisory council nga raya hay sangka multi-stakeholders group nga ginaeakipan it mga sibilyan halin sa nagkaein-eain nga sektor it komunidad.
Tuyo sigon kara nga mabuligan ro pwersa it kapulisan nga mapabilin ro peace and order sa sangka banwa.
Ro konseho sigon ro maga-advise ag maga-assists sa Kalibo municipal police station sa pagtumod sa mga nagapangunang prayoridad ag mga importanteng isyu may kaangtanan sa PNP patrol plan.
Programa sigon raya it gobyerno agud nga mapabag-o ro imahe it PNP ag mas pang mapa-improve ro kalidad it pagserbisyo kara sa komunidad.
Gindugang pa ni Tolentino nga ro partisipasyon it sibilyan sa pagpabilin it kalinong ag katawhay sa sangka lugar hay mabahoe nga bulig sa kapulisan.
Pila sa andang igaduso hay ro pag angkon it kaugalingon nga building ukon headquarters it Kalibo PNP kamana man ro pagbutang it dugang nga mga CCTV cameras sa mga kabarangayan ag dugang nga mga lightings.
Nasayuran nga ro bag-ong miyembro it advisory council hay magapungko sa sueod it daywang dag-on.
