KALIBO, Aklan—Pareho nga nagpakita it mayad nga performance ro Boston Celtics ag Dallas Mavericks sa game 1 it NBA finals.
Raya ro naging assessment ni Banga Sangguniang Bayan member Jocel Rata bilang sangka sports analyst.
Apang natiempuhan eamang suno kana nga mas gindomina it Celtics ro hampang rason nga naangkon nanda ro 1-0 lead sa score nga 107-89.
Nagpadaog sigon sa Celtics sanday Jaylen Brown ag ro uman nga nagbalik nga center nga si Kristaps Porzingis nga nakahimo it 20 markers, 6 rebounds ag 3 blocks sa sueod it 21 minuto nga sangka tumaeagshon nga kahigayunan.
Nasayuran nga ro 7-foot-3 Slovenian center hay nakaangkon it strained right calf ko Abril 29 ag kahapon eamang uman nga nakahampang makataliwan ro sang buean nga pagpahuway.
Gingamit sigon it husto it team si Porzingis sa anang depensa, opensa ag outside shooting.
Mag-eowas pa sa kamayad it mga players nga puro sanay sa championship ag nakaangkon it chemistry hay nakabulig pa ro home court advantage sa Celtics sa unang pag-atubang nanda it Dallas.
Samtang, ginbandera man sigon ni Luka Doncic it Dallas ro anang 30 points samtang may 14 markers si P.J. Washington ag 12 points si Kyrie Irving.
Bangud sa natabu, panigurado suno kay Rata nga magabawi ro Dallas sa game 2 sa Lunes nga adlaw.
Kinahangean eamang suno kana nga maghimo it adjustment ro team.
Sa 1st game hay naduea-an eamang ro mga raya it ball rotation nga naka-focus eamang kay irving ag doncic kun sa siin dapat nga magamit ro iba pang players.
Dugang pa nga bukon sigon it hinangae sa sangka championship game nga makaposte ro Celtics it indi magnaba sa 20-points nga abanse sa first hasta sa ulihing quarter it hampang.
