KALIBO, Aklan—Gindesisyunan it mga awtoridad nga i-eubong eon lang sa eugta ro bangkay it sangka 44-anyos nga eaeaki gamit ro sangka backhoe nga namatay bangud sa ginadudahan nga coronavirus disease 2019 o COVID-19 mag-eowas pa sa ginabatyag kara nga sakit sa kidney ukon bato.
Suno kay Kalibo Mayor Emerson Lachica, owa it nagabaton nga crematorium sa siyudad it Iloilo bangud nga nag-eampas eon sa 12 oras ro bangkay ag kinahangean sigon raya nga maeubong sa sueod it 24 oras.
Ro pag-eubong sa bangkay sa Kalibo Municipal Cemetery hay ginsaksihan mismo it alkalde kaibahan si Municipal Health Officer Dr. Jocelyn Garcia.
Namatay ro eaeaki sa Aklan Provincial Hospital nga kan-o eamang hay 6 nga staff kara ro nag-positibo sa COVID-19 rason nga kinahangean sigon nga masunod ro polisiya nga dapat nga ma-cremate eagi ro tanan nga mga pasyenteng namatay sa nasambit nga ospital.
Sa pihak kara, ginduea ni Mayor Lachica ro pagkabaeaka it publiko bangud nga sandig sigon sa patakaran ro pag-eubing it bangkay sa sementeryo.
Maskin suno kana ro mga nag-asisst na taga punerarya ag sanitary personnel hay naka suksok it personal protective equipment ag pagkatapos it eubong ag disinfection hay ginsunog ro tanan nga gingamit nga PPE.
Samtang, gin-abisuhan ni mayor Lachica ro mga residente nga magpabilin sa sueod it baeay agud nga maging eowas halin sa virus samtang owa pa it bakuna.
