KALIBO, Aklan — Ginpasiguro it Barangay Council it Pook Kalibo nga magapatuman it mas hugut nga mga tikang sa seguridad agud nga malikawan nga matabu it uman ro insidente it pagpamaril nga ginkamatay it sangka 36 anyos nga eaeaki nga gina alegar nga may mental disability sa Pook Jetty Port, gabi-i it Domingo, Hunyo 28.
Sa pihak kara, ginpahayag ni Punong Barangay Lodi Pinos nga maskin nga owa pa natabu ro insidente hay hugut nanda nga ginapatuman ro pagpatrolya sa lugar eakip ro koordinasyon sa kapulisan rason nga insigidang nakakaresponde sa anumang kinagamo ag napabilin ro kaayusan ag kaeowasan it mga residente ag mga nagapamasyar sa lugar.
Natiempuhan eamang suno kana nga sa pihak nga direksyon nag-roving ro anang mga tanod kat matabu ro insidente.
Samtang, depensa sigon it suspek nga self-defense eamang ro anang ginhimo matapos nga makabatyag it paeag sa anang kabuhi nga ginhana man nga salakayon it biktima rason nga nagpaeupok it baril.
Owa eon sigon imaw it ibang madaeaganan kundi nga mag-eumpat sa seawall rason nga ginbo-oe ro anang baril.
Naga-jogging eamang raya kat masub-eang ro naga-amok nga biktima.
Base sa paunang imbestigasyon it kapulisan, bago ro insidente hay ginasugid nga nag-amok ro biktima ag ginpaeag ro sangka grupo it mga pamatan-on.
Tinamaan ro biktima sa kilid nga naging rason it anang insigidang pagkamatay.
Naaresto eon ro suspek ag presenteng sa kustodiya it kapulisan samtang ginapahaum ro nagakaigo nga kaso kontra kana.
