KALIBO,Aklan — Suportado it grupong Bagong Alyansang Makabayan ukon Bayan Aklan ro tikang ni Aklan first district board member Nemesio Neron kon sa siin ginproponer kara sa sangguniang panlalawigan nga makaangkon it legislative inquiry kaibahan ro mga natungdan nga ahensya it gobyerno agud nga usisaon ro presenteng sitwasyon it probinsya Aklan partikular kon nagapabilin pa baea nga insurgency free.
Suno kay Mr. Kim Sin Tugna, provincial coordinator it Bayan Aklan nga halin ko dag-on 2010 hay gindeklara nga insurgency free ro Aklan rason nga uwa sanda nagapati nga may engkwentro nga natabo sa kabukiran nga sakop it banwa it Libacao kapareho sa ginapaguwa nga impormasyon it Philippine Army.
Nagakadapat gidman sigon nga usisaon it uman ro insurhensiya it probinsya it Aklan.
Madumduman nga mag-eowas sa engkwentro sa nasambit nga banwa hay may nadakpan man nga ekstorsyunista sa banwa it Makato kon sa siin nabulgar ro andang pagpangikil sa negosyante ag naaresto ro suspek nga si Prince Igudas it Tapaz, Capiz kaibahan si Maria Rita Malandac, tubong banwa it Kalibo apang presenteng naga-istar sa Oton, Iloilo.
Nauna eon nga ginpahayag ni board member Neron, gusto nana nga imbitahan ro mga natungdan nga otoridad para maklaruhan ro publiko ag kon anu ro dapat nga himuon angot sa nasambit nga isyu.
