Kalibo Aklan ——-Gina-engganyo makaron it Bureau of Fire Protection (BFP) Aklan ro mga pumueoyo nga i-arrange ro andang mga nakatambak nga papeles ukon mga papel bangud sambilog raya sa mga tikang nga pwedeng himuon agud nga makalikaw sa sunog.
Raya ro ginpahayag ni FO3 Mark Alvin Patricio, tagapaghambae it BFP Aklan sa interview it Bombo Radyo.
Suno kana, kon nakaplastar it husto ro mga nakatambak nga kagamitan ag maeayo sa saksakan hay posibleng makalikaw sa magatuhaw nga sunog partikular makaron nga fire prevention month kasunod it grabe nga kainiton it tyempo nga naeksperyensyahan.
Ginpaathag ni Patricio nga kuryente ro nagapangunang rason it sunog.
Halimbawa eon kara ro mga appliances nga uwa na-unplug ukon overloading.
Masami raya nga nagakatabo kon nalilipatan ro nakasaksak nga kagamitan nga nagaresulta sa pagka-overheat.
Sa makaron sigon nga tyempo nga una pa kita sa idaeom it paeag it pandemya hay may kahigayunan ro mga pumueoyo nga ayuson ro electricity sa andang tagsa ka panimaeay bangud nga maabo eon ro andang oras sa pagtinir sa baeay.
Ro Marso ro ginakabig nga pinakamainit nga buean sa nasyon ag daya man nga buean ro gindeklara sa pagdumdom it fire prevention bangud nga kaeabanan it mga insidente it sunog hay sa raya nga buean nagakatabo.
