KALIBO, Aklan–Bantay sarado it gintingub nga pwersa it Philippine National Police, Philippine Drug Enforcement Agency (PDEA) ag Department of Tourism ro isla it Boracay kasunod it pagbuhos it mga bakasyunista.
Suno kay Agent 5 Jane Fatima Tuadles it PDEA-Aklan nga nagpirma it sangka kasugtanan ro tatlong ahensiya it gobyerno agud nga mapugngan ro pagkalhit it iligal nga droga sa mga tourist destinations.
Sa idaeum sigon it nasambit nga kasugtanan, magatukod ro PDEA it Tourism Operation Protection Against Illegal Drugs ukon PDEA TOP AID assistance and complaint desks sa mga sikat nga tourist destinations sa nasyon kapareho it Boracay.
Kaeabanan suno kana nga target it mga grupo it drug trafficking ro mga tourist spots bangud sa “ready market” ro mga dumueuong ag lokal nga turista nga maabung kwarta.
Gindugang pa ni Tuadles nga maga-deploy man ro PNP ag PDEA it dugang nga mga pulis agud nga mas pang mapabaskog ro police visibility sa tuyo nga mabaeabagan ro anumang iligal nga aktibidad.
Kaibahan sa andang pagbantay ro mga K-9 sniffing dogs nga magahugum sa mga bagahe it mga turista.
Gina-engganyo man nana ro mga barangay officials nga maging mapagbantay sa andang nasakupan eabi eon sa mga bag-ong salta sa lugar agud nga insigidang madakpan ro mga nagapasueod it iligal nga droga.
