KALIBO, Aklan–Owa pa it plano ro gobyerno probinsiyal it Aklan nga buksan ro isla it Boracay sa turismo sa tunga it coronavirus disease (Covid-19) pandemic.
Suno kay Ibajay Mayor ag League of Municipalities of the Philippines ukon LMP Aklan chapter president Joen Miraflores nga raya ro sambilog sa andang natalakay sa ginpatawag nga meeting kaibahan ro provincial inter-agency task force ag pilang medical experts.
Raya hay maskin nga ginpaidaeum eon ro Aklan sa general community quarantine umpisa Mayo 1.
Ginpahayag ni Miraflores nga mabahoe ro posibilidad nga magbuhos ro mga pumueuyu sa isla engkaso nga raya hay buksan bangud sa haeos sang buean nga pagtinir sa sueod it panimaeay.
Maskin suno kana ro pag-excursion sa mga beaches hay owa anay ginapasugtan bangud nga bawae pa ro mass gatherings.
Nauna eon nga ginpahayag ni governor florencio miraflores nga igakonsulta pa kara sa national IATF ro uman nga pagbukas sa bantog nga isla bangud nga ro turismo ro sambilog sa paeangitan-an it Aklan.
Nakabakae eon man suno kana ro probinsiya it machine nga sarang nga makahimo it rapid test sa mga turista nga magabakasyon agud nga masiguro nga magapabilin nga Covid-free ro boracay.
Madumduman nga mag-eowas sa COVID 19, grabeng naapektuhan man ro mga tag-ana it hotel ag resort kamana man it mga maintok nga negosyante sa pagpanaeasa it bagyong Ursula ko Disyembre 2019 ag ro 6 nga buean nga pagpasarado bangud sa environmental issues.
