KALIBO, Aklan–Nakalista ro isla it Boracay it pinakamataas nga tourist arrivals ko Disyembre makaron nga tiempo it pandemya daea it COVID-19.
Raya ro ginpahayag ni Felix Delos Santos it Malay Tourism Office.
Base sa andang datos, nagapakita nga 113,596 nga turista ro nagbisita sa isla umpisa Disyembre 1 hasta 31, 2021 makabig nga pinakamataas nga numero ko nagtaliwan nga dag-on kun sa siin naeampasan kara ro nailistang 67,343 nga arrivals ko buean it Nobyembre.
Naga-average sigon sa masobra sa 3,000 hasta 6,000 ro mga turista nga bumuhos sa Boracay ko buean it December.
Ko Disyembre 23 sigon nakalista it pinakamaabu nga bisita nga nag abot sa 6,700.
Umpisa Enero 1 ag 2, nakalista it 7,793 nga bisita.
Sa pihak nga parte, bangud sa paghaeuga sa restrictions, ro mga biyahero sa Boracay hay required eamang nga magpakita it negative test result para sa mga owa pa nabakunahan ukon naka-unang dose pa eamang least 72 oras antes ro adlaw it pagbiyahe samtang ro mga fully vaccinated nga turista hay kinahangean nga magpakita eamang it vaccination card ukon certificate ag ro hotel booking.
Samtang, bangud sa kanselasyon it sea sports ag aqua sports activities bangud sa gale warning nga ginpaguwa it pagasa , maabu sigon nga mga service providers ro naga-reklamo
Apang owa sigon sanda it mahimo kundi nga magsunod para sa kaeowasan it mga turista.
Sa pihak kara, todo enjoy man gihapon suno kana ro mga turista sa land tour nga andang gina-offer.
