KALIBO, Aklan—Magapadaea it augmentation force ro barangay council it Estancia sa nagkaeain-eain nga sementeryo nga sakop it andang lugar sa adlaw it pista minatay.
Suno kay Punong Barangay Daisy Andrade it Barangay Estancia, Kalibo nga igapadaea nana ro 17 nanda nga barangay police agud nga maging kabulig it Kalibo PNP sa pagbantay it peace and oder ag daeagan it trapiko agud nga masiguro ro kaeowasan it mga pumueuyu nga naga-agto sa mga sementeryo eabi eon sa Medalla Milagrosa nga kaeabanan nga ginadagsa it mga tawo.
Ginpahayag dugang nga bangud nga masobra sa daywang dag-on nga owa naka-agto ro mga tawo sa puntod it andang mga mahae sa kabuhi sa adlaw it Undas bangud sa pandemya, sigurado nga pagadagsaon makaron ro tanan nga mga sementeryo sa Nobyember 1 ag 2.
Samtang, nakasanayan eon suno kana nga nagapatuman it re-routing scheme ag gina-obra nga one-way ro Osmena Avenue agud nga malikawan ro paggutok it trapiko.
Sa pihak nga parte, ginabawae suno kana ro pagdaea sa sueod it sementeryo it aeak, flammable materials, baril ag anuman nga mga mataeum nga bagay kapareho it kutsilyo ag cutters kamana man ro videoke ukon sound systems nga magatuga it mabaskog nga tunog.
