SPORTS News– Kapin sa napueong dominggo antes ro nakataeanang hampang, naka-pokus makaron ro batikang boksingero nga si Canelo Alvarez sa anang cardio workout.
Nakataeanang makasambuwa ni WBO light heavyweight Champion Alvarez ro mas batang Middleweight boxer nga si Jermell Charlo sa Setyembre 30, sa Las Vegas.
Suno sa kampo ni Alvarez, puspusan eon ro cardio-training it batikang boksingero bangud sambilog raya sa mga nakikita nandang magiging kahinaan nana sa nasambitang hampang.
Pila sa mga cardio workout kara hay ro wind sprint ag pagdaeagan sa matarik nga bukid.
Nagapati sigon ro kampo ni Alvarez nga kon gusto nana nga sabayan ro batang kontra hay mas bagay ro mga nasambitang training kumpara sa simpleng jogging nga ginahimo.
Apisar nga nahimo eon ni Canelo nga maipadaog it 59 nga anang naunang kontra, inde maikaila ro problema sa stamina eabi eon sa mga ulihi kara nga hampang.
Sa makaron, ginabuytan ni Alvarez ro record nga 59 – 2 – 2.
39 kara hay puro mga knockout wins.
Samtang, ginabuytan man ni Jhermell Charlo ro 35 – 1 – 1 nga boxing record kon sa siin 19 kara hay puro mga KO.
Ginaeauman it mga boxing analysts nga magiging fast-paced match ro hampang it daywang batikang boksingero.
