Ginbulgar ni Senator Risa Hontiveros sa anang privilege speech sa Senado ro human trafficking scheme nga kahimuan sigon it Chinese mafia nga nagarecruit it mga Pinoy para magtrabaho bilang scammers sa Myanmar.
Ro pagbulgar it Senadora hay sandig sa naging testimoniya it 12 Pilipino nga naeowas maghalin sigon sa sindikato nga naga-operate sa Myanmar.
Suno kay Sen. Hontiveros, ginpromisahan sigon ro mga raya it trabaho bilang customer service representative ukon data encoder sa sangka call center apang pag-abot it mga raya sa Thailand kung siin nanda ginaeauman nga magatrabaho apang gindaea sanda sa Myanmar it Chinese mafia para pagahimuon nga scammer nga nagagamit it crypto currency.
Ginpahayag dugang pa it mamalidha nga owa sanda ginapakaon, owa ginataw-an it sweldo ukon ginabaligya sa ibang kompaniya ukon ginahagkat ro andang kabuhi kung owa sanda it na-scam gamit ro crypto currency.
Ro pahayag it mga biktima nga gusto it sindikato ngna tanan it andang marecruit nga scammers hay grupo it mga Pilipino bangud eon man sa proficiency ukon kamayad sa lenggwaheng English.
