KALIBO, Aklan—Padayun nga ginatumod it Boracay Inter-Agency Task Force ro motibo it Chinese tourist sa pagbutang it bandera it China sa front beach ag stage it sangka pampublikong eskwelahan sa isla it Boracay ko nagtaliwan nga mga inadlaw.
Suno kay Boracay Inter-Agency Rehabilitation Management Group (BIARMG) general manager Natividad Berdandino nga owa pa nanda natumod ro pagkatawo it nasambit nga turista.
Kon ro tuyo sigon kara hay bilang locator para sa group tour hay owa raya it big deal.
Apang kon malisyoso ro intensyon hay ibang istorya eon raya.
Nasayuran nga naging viral sa social media ro daywang litrato, kun sa siin, makit-an ro sangka owa nakilaea nga turista nga nagtindog it bandera it China sa front beach ag sa stage it Balabag Elementary School.
Raya hay umani it nagkaeain-eain nga reaksyon halin sa mga netizens.
Nasayuran nga ro China ro nagapanguna makaron sa listahan it mga dumueuong nga turista nga nagbakasyon sa isla makaron nga 2019 base sa record it Malay Municipal Tourism Office.
