KALIBO, Aklan—Umarangkada eon ro Community Based Monitoring System (CBMS) sa pilang kabanwahanan sa bilog nga probinsya it Aklan.
Raya hay ginapangunahan it Philippine Statistics Authority (PSA), Department of Information and Communications Technology (DICT) ag Department of the Interior and Local Government (DILG).
Ginpahayag ni Ms. Rodelyn Panadero it PSA-Aklan nga kapin sa 11 nga munisipalidad eon ro nagpabutyag it interes nga magpasakop ag mag-umpisa it survey.
Ko adlaw it Sabado suno kana hay nagpatigayun sanda it road show umpisa sa banwa it Kalibo ag naglibot sa mga kabarangayan it Numancia.
Ro CBMS hay ginapatigayun it sang beses kada tatlong dag-on.
Tanan nga data suno kana hay ginabuoe it andang enumerator sa kada household.
Gin-engganyo man kara ro mga pumueoyo nga makipag-kooperar sa andang mga tawuhan ag sabton it tampad ro mga pangutana.
Ginpasiguro man kara nga euwas ro tanan nga impormasyon nga andang ginabuoe.
Ginpahayag dugang nga ro CBMS hay nagatumod sa estado it sangka barangay kamana man nga dikara ginabase ro plano it gobyerno ag matumod ro kinahang-eanon it mga pumueoyo.
