Sumipa pa sa kapin P1.29 billion ro haega it danyos nga gin-aywan sa sektor it agrikultura it bagyong Karding.
Sa ginpaguwa nga latest Bulletin No.5 it Department of Agriculture (DA), sakop sa mga apektadong taeamnan sa Cordillera Administrative Region (CAR), Ilocos Region, Cagayan Valley, Central Luzon, Calabarzon, ag Bicol Region.
Bangud kara, tumaas pa sa 82,158 ro numero it mga mangunguma ag mangingisda nga apektado.
Mas nag-eapad pa sa 141,312 ektarya it agricultural areas ro nadaeasa it super typhoon.
Raya hay katumbas it 72,231 metric tons it production loss.
Kaeakip sa mga apektadong commodities ro palay, mais, high value crops, livestocks ag poultry ag fisheries.
Kasunod it pag-eapad pa it danyos sa agrikultura, gintasan eon man it DA ro ayuda nga igatao para sa mga apektadong mangunguma ag mangingisda.
Kapin sa P27.47 million eon ro kantidad nga gintaeana para sa pagpanupod it rice seeds para sa mga apektadong manguguma , P13.23 million ro haega para sa corn seeds ag P12.64 million para sa assorted vegetable seeds.
Samtang, nagtaeana man ro ahensiya it P2.45 million haega it animal heads, drugs ag biologics para sa livestock ag poultry.
