KALIBO, Aklan—Magapatigayon it special recruitment activity ro daywang ka maeagkuang kompaniya para sa mga Aklanon nga naga-usoy it trabaho sa guwa it nasyon kamana man para sa mga seafarers nga gustong bumalik sa pagtrabaho sa eawod.
Suno kay Public Employment Service Office ukon PESO Aklan manager Marsh Bernabe nga ro nasambit nga recruitment company hay nagakinahang-ean it nurses para sa Germany, teachers nga igadeploy sa Thailand, caregiver, households workers para sa Qatar ag maabong iba pa.
Ro aktibidad hay igapatigayon sa sueod it daywang adlaw umpisa makaron nga adlaw it Martes, Hunyo 14 hasta it 15 sa taeatapan mismo it PESO.
Samtang, ginpahayag dugang ni Bernabe nga ro recruitment it mga seafarers hay magabuhay it tatlong adlaw nga maga-umpisa sa Hunyo 14 hasta it 17 sa Aklan Polythecnic College.
Nasayuran nga in demand makaron ro mga seafarers bangud sa ginhaeogaan nga restrictions sa pag-apply sa nasambit nga trabaho.
Ginpadumdom ni Bernabe ro mga job seekers nga pahaumon ro andang mga nagakaigong dokumento ag kumpletuhon eagi sa pagdaea agud sa pagsikyar sa mga raya.
