KALIBO, Aklan–Ginakalipay it Department of Environment and Natural Resources (DENR) ro pagkaeakip sa isla it Boracay sa ‘50 world’s greatest places of 2022’ it Time magazine.
Suno kay DENR OIC Secretary Ernesto Adobo, Jr. ro pagkilaea halin sa sangka award-winning publication hay nagapamatuod eamang nga naging madinaeag-on ro pag-rehabilitate it Boracay sa idaeum it Duterte administration.
Nasayuran nga sa Hulyo 25 hasta Agosto 1 nga issue it Time magazine hay naeakip ro isla sa 50 “top spots to visit this year” sa bilog nga kalibutan.
Naghalin ro mga nominasyon sa network it correspondents ag contributors it nasambit nga American News Magazine.
Madumduman nga ko Mayo 8, 2018 hay ginpaguwa ni dating Pangueong Rodrigo Duterte ro Executive Order 53 nga magtukod it Boracay Inter-Agency Task Force (BIATF) nga nagatuyo nga magbilog, dumaeahan ag hugut nga ipatuman ro mga laye ag ordinansa para sa rehabilitasyon it boracay.
Ginkilaea man ni Adobo nga dating BIATF Secretariat head, ro pagdumaea ni dating DENR Secretary ag Task Force Chairman Roy Cimatu, mga co-chair nga sanday dating Secretaries Eduardo Año it DILG ag Bernadette Romulo-Puyat it DOT sa madinaeag-on nga rehabilitasyon sa isla.
