KALIBO, Aklan — Ginapasuspinde eon it Department of Environment and Natural Resources (DENR) ro dragon boat race sa isla it Boracay.
Raya hay kasunod it pagkamatay it pitong paddlers it Boracay Dragon Force team matapos nga hampakon it mabaskog nga humbak samtang nga naga-training sa nasambit nga isla.
Sa mensahe nga ginpaguwa it DENR, ginmandu ni Environment Secretary Roy Cimatu ro pagbawae anay sa dragon boat race samtang nga nagapadayun ro imbestigasyon sa nasambit nga insidente.
Angot kara, nakataeana nga magapueong sa Setyembre 30 ro nagkaeain-eain nga ahensiya it gobyerno nga naging kaibahan sa emergency and rescue response kat matabu ro insidente sa dagat.
Madumduman nga 14 ro nakaeowas sa 21 nga miyembro it grupo matapos nga kumueob ro andang ginasakyan nga dragon boat kat hampakon it mabaskog nga humbak kat ginplano nanda nga maglibot sa beach front samtang nga naga-training para sa paga-intrahan nga international competition sa nasyong Taiwan.
