KALIBO, Aklan—Gintaeana makaron si Director II Martin Jose Valentino Despi bilang bag-ong general manager it Boracay Inter-Agency Rehabilitation and Management Group.
Ro BIARMG hay ro implementing arm it Boracay Inter-Agency Task Force (BIATF).
Ginasugid nga si Despi hay bukon eon it bag-o sa mga ginapatigayon nga rehabilitation works it gobyerno sa isla bangud nga imaw ro dating Head Coordinator it Beach Tourism Monitoring Team it Department of Interior and Local Government (DILG) nga nakatutuk sa pag-umpisa it pag-ayos ag paglimyo sa lugar.
Halin sa DILG, ginsaylo imaw sa Department of Environment and Natural Resources (DENR) ag gintaw-an it posisyon nga Director II sa Environmental Management Bureau (EMB).
Antes ro anang assignment bilang BIARMG general manager, si Despi hay naging Assistant Regional Director for Special Concerns sa National Capital Region.
Ginbayluhan ni Despi si Natividad Bernardino , kun sa siin , ana raya nga ginpasaeamatan bangud sa dedikasyon sa pihak it mga peligro ag paeag nga nabaton agud nga mapatuman ro mandu ni dating DENR sec roy cimatu nga uman nga maayos ro Boracay bukon eamang it para sa mga pumueuyu kundi para sa bilog nga nasyon.
Kadungan kara, gin engganyo ni DENR-6 regional executive director Livino Duran si Despi nga tutukan ro mga nabilin pang trabaho antes nga eubusan nga matapos ro termino it Boracay Inter-Agency Task Force sa Hunyo 2022.
Nagaeaum man si Duran nga mabilog ro Boracay Island Development Authority ukon BIDA sa mas madali nga tiempo nga hugut nga ginapamalibaran it mga boracaynon ag iba pang pumueuyu ag sektor sa Aklan.
