KALIBO, Aklan—Ginapatrabaho eon it Department of Public Works and Highways ukon DPWH-Aklan sa andang mga tawuhan ro ginareklamong lubak-lubak nga karsada sa mga road section sa eastern part it probinsiya.
Raya ro ginpahayag ni Engr. Joey Ureta, chief maintenance division it DPWH-Aklan.
Nasayuran nga matapos ro naexperiensiyahan nga maeapnagon nga pagbaha tuga it bagyong Paeng ko nagtaliwan nga buean it Oktubre hay nataeupangdan ro pag-angkon it mga lubak-lubak sa karsada halin sa national highway nga sakop it kalibo hasta sa banwa it altavas.
Reklamo it mga motorista nga takaw-aksidente ro nasambit nga mga potholes.
Ginpahayag ni Engr. Ureta nga gin-una nanda nga i-repair ro road section nga sakop it Aranas sa banwa it Balete hasta sa Altavas.
Ginpasiguro man nana nga pagatutukan ro mga karsadahon nga sakop it Libas, Banga nga nakaangkon it grabeng kasamaran, kun sa siin ro pilang portion hay nagakinahangean it mabahoe nga pondo.
Mag-eowas sa eastern section hay umpisahan eon nanda ro pag-repair it mga karsadahon sa western section it Aklan eakip ro tulay nga naga-konekta sa Kalibo ag Numancia nga nakaangkon it mabahoe nga buho.
Maga-dere-deretso sigon ro andang trabaho sa oras nga magapadayun ro mainit nga paniempo.
Samtang, bangud sa tiempo it tag-uean, ginataw-an man nanda it atensyon ro de-clogging ag clearing sa mga kanae.
